Ut neis steet dr bol van: kèrls uut de stad gaon massaal ‘de boer op’ um carbid te haol’n. Laot ik oe veuraf dit zegg’n, leu: ie’j mot met de hande afbliev’n van da gerei. Carbid hef niks in de stad te zuuk’n. Wa denk ie stads’n noe helemaole? A’j normaliter vuurwark afstekt, dat ie’j dan ook met carbid aan de gange kunt? Ut feit dat mien klega boer’n oe da spul verköpt, wil nog neet zeg’n da’j d’r ok met an de gange mot. Bovendien gaot d’r gin jaor veurbie’j of ie’j hebt daor in de stad wel bewezen da’j ok neet met vuurwark um kunt gaon. (tekst löpt wieder onder’n foto)
D’n schriever in zien natuurlijke habitat. Foto ©Chiel Baauw.
Den Haag: spuut 11 loat van zich heur’n
In Den Haag bunt ze d’r noe ook achter dat carbid in de stad neet zo’n good plan is. Mooi te laote dan… Ie’j hebt oew gerei al lang in huus, da we’k wal. Een slimme boer hef oe daor ok nog een melkbusse biej verkocht. Denk ie’j dat ie’j een echte olde, dikke melkbusse met naor huus genommen hebt? Dat bunt gewoon van die dunne knooidinger uut China. Die barsten oe al uut mekare a’j d’r allenig al naor kiekt. Andere boer’n verköpt oe löge varfblikken met deksel. Dat deksel bu’j naor ut eerst schot al kwiet, dat zeg ik oe. He’j niks an. En wat gao’j dan doon? Juust. Experimenteren. Dan he’ j de schaop’ n ant driet’ n an, leu.
Bu-j een eigenwieze pradde? Ie’j wet ut allemaol wel? Dan za’k oe sketsen hoe dat aflöpt: zoas alle beginners he’j de melkbusse lieke rechtop staon. Ie’j smiet water bie’j de carbid. Dan het deksel d’r op, ie’j rost dat ding nog een keer extra de busse in, want da he’j op YouTube gezeen. Dan vuur bie’j ut gat hold’n… Daor he’j de knal. Zo hard, da’j oe bedoane hebt. Heur’n doe’j ok neet meer. Die’jen deksel, die bu’j kwiet. Tot enne straot wieter een autoalarm afgoat. A’j geluk hebt. A’j minder geluk hebt, komt ut deksel oe midden lieke op de hasses pleren, net a’j naor boav’n kiekt. Dan weddie’j da’j tot mei allenig nog maor pappe te vrett’n krieg.
Ut kan altied slimmer
Zoas altied he’j nooit bekieks genog en weerhold de pillen die’j op hebt oe d’r neet van um oew noaber te loat’n zeen wa’j zoal kunt. Neet dat um da iets doot, die is ok zo dik als duuz’nd man. Ut carbid wordt in ut göttengat gedonderd, ut hef tuul’k onmundig gerègen’d, ie’j smiet d’r een striekhöltje achterhenne… Dat moment bezörgt oe eeuwige roem in ut noaberschop. Geen roette meer te bekennen in een blökske van vier straot’n. De dritte zit oe in ut gevret en ie’j könt bie’j de bürgemeister Dixies veur het ganse noaberschop anvroag’n. Moar neet veur da’j 112 gebeld hebt, umdat tante Miene op 22 van den braaskerd de piepe uut egaone is.
Ik wil hier neet de pieneköttel uuthang’n, maor zeg neet da’k oe neet veuraf gewaorschuwd heb. 1 januari wollen wie sowieso op ut platteland met d’n pingelbuul langs de boerderie’jen gaon, veur de stadsen die slachtoffer van carbid bunt. As ik tenminste neet te sloerig in d’n rakker bun.
Doe ut hendig an, leu.
Groet’n uut d’n Achterhook en daldeej-ze!
